عطر الشوگ

"عطر الشوگ"

یا شوگی..

المثل شمعه..

تچارب هندس اهمومی..

و تضوّی بدربی وتعلگه..

ومثل ورده ...

ابعطر ورده...

تفوح اویه النسیم اتطیر وتشبگه..

بخلگ ورگه...

تطیر اویه الهوا وتسمه..

تطیر اویه الهوا و هوَّ..

یطیر اویاک من اتفوح..

اوبین احضانه من اتدور..

تلبسه اثیاب من اعطور..

وتظل تسمه..

وتحط علغیم تحچیله ..

عن النعناع و عن الیاس..

وتغنیله ابأغانی الشوگ..

ومن تحچی..

یحن للگاع..

 والبستان..

والبرحی..

ویظل یبچی..

وترد اویالمطر للگاع..

وتنزل شوگ..

علی اربوع الفلاحیة..

وتمر من یم لیالیها.. وقصایدها..

وتمر علهور والمشحوف..

وتهب نسمات عل فلّاح.. وبیت الطین..

وعلی الیراحی من تنزل..

تدور ابراسه سالوفات..

من الزود ..

من المای ..

وسالوفة بلم والروی..

وتگعد یم جسر حالوب..

وتعزفله ..

وتذکره النای والمطبگ..

وتغنیله ابأغانی الشوگ..

وتحچیله ..

قصص حب قیس وی لیلىٰ..

وقصص حب قیس وی لبنىٰ..

وقصاید من عشگ "عادل"..

وتحط یم ملا فاضل طیر ..

وتجی لتراب گبره ابشوگ..

وتگراله..

 على روحه..

 ابوذیات..

وتگراله..

 "احبچ یا فلاحیتی"..

وخفیف اتصیر ..چالعاشگ ..

ترد تسمه..

وتظل تصعد..

وتوصل فوگ یم الله ..

وتسولفله وتگلّه  الگاع، ماتنباع، ماتنعاف ..

یبسّم لک..

وترد اتگلّه لو هلگاع لو یمّک..

ک: عبدالله النعیماوی