آخر أمل

«آخر أمل»

ابلیله ظلمه وبارده ابمک الشته..

لیله هندس موحشه ابلایه ضوه‌‌..

والعواصف کسّرن بیبان خلگی وکسّرن باب الهوی..

وتمطر اغیوم التعیسه احزان تمطر..

مالی مأوی وسگف بیت احلامی ماغطّانی چان  اممزّگ ایخر..

تایه اببحر المصایب.. والأمواج الهایجه تُغْلگ نوافذ صبر بیَّ وزورق آمالی امکسّر.‌.

وببحر کلش غمیج..

وببحر مابیه ساحل حرت یاصوب آنه اروح ..

والهموم اتنبّع اهموم ابغزاره ابکل مکان وبیَّ فز طوفان نوح..

 ولو مااگدر افوی او سیف دهری اچتافی طابر‌.‌.

لیش اموت..

لیش اغرگ وانا دین العشگ دینی ومانی کافر..

غمّضیت الجفن لحظة..

لحظه شمیت الحیاة..

وفتّحتهه العین صوب آخر امل..

ماشفت لالیل لاهم لامطر ..

لاعواصف لابلم مزروف لا موی وبحر..

شفتک انت.. انت یل کلّک صحو..

ک: عبدالله النعیماوی